فضلت أدقق فى ملامحى سنين وأيام
وأبص و أعيد البص
فى مرايتى وأطل
ألاقى ملامح تشبهنى لاكن
هيكل انسان
واعيد الشوف من كتر الخوف
اخرج للشارع
هايم مزهول انده ع الناس
الناس تايهين ماشيين ضايعين
شاربين المر
من تحت الساس
واصل للراس
واعيد الشوف من كتر الخوف
انده ع الناس
الكل سادد ف ودانه والصوت مقطوع
وف عز الحيرة
لمحت بعينى من زاوية شىء مش معقول
راجل مبرور
قاعد ف الركنه
مسنود ع السور
وشه زنهار
وكأنه نهار
وياه أطفال
بيعلمهم
زى الكتاتيب
رميت سلامى وحيانى بألف سلام
وقبل ما أنطق بسؤالى
بص ف عينى وملامحى قرأ المكتوب
وجاوبنى
بربى أجيال من دلوقتى تنفع بكرة
ما خلاص يا أبنى
العار ف بلدنا متوصم على ألف جدار
والصورة الحلوة لآمجدنا غرقت ف ضلال
وأنا قاعد يومى أستنى يطلعلى نهار
ويمر نهار وبعده نهار
والوطن الحلم اللى أنا عارفه
بابه موصود وعليه حراس
ومارد مصلوب
وكأنه مقرر على شعبى أو فى الكراس
ورجعت أدقق فى ملامحى
وأعيد الشوف
بسرعة لقيت شكلى أتغير من كتر الخوف
ومشيت هايم على وشى
زى المجنون أنده ع الناس
أخرجوا م الخوف
وأتحدوا المارد
وأعيد الجملة وانا بصرخ
أخرجوا م الخوف
أمشوا للموت من أجل حياة
من اجل أم فضلت صابرة
على المكتوب
من اجل الواد من اجل البنت
من أجل الناس اللى بتصرخ من غير
صوت
قبل القطر ما يفتنا وبسرعة يفوت
من أجل مصر
علشان تحيا وعمرها ما تموت
*********
معلم فحمه ...........
عن أبي سعيد الخدري رضي الله عنه عن النبي قال
أفضل الجهاد كلمة عدل عند سلطان جائر .رواه أبو داود والترمذي وقال حديث حسن
http://omran55.maktoobblog.com/
جميع اعمالى موثقه على مدونتى
http://dastor76.blogspot.com/
ليست هناك تعليقات:
إرسال تعليق